Il mus

Jo crôt che sedin ben pocjis personis,
che propri, mai no vein vidût il mus.
E dai mus a si contin des robonis
che fasin ridi feminis e fruts:
par chest il mus, ch’al sedi, a mi pâr,
une bestie ‘ne vore popolâr.
Il mus l’à dôs orelis, che consolin,
une crôs piturade su la schene,
I mus cuant che son stracs a si tombòlin
e disin che la tombule sei vene;
par cognossiju nel sés, in gjenerâl,
no coventin ocjâi, né canocjâl.
Il mus co si lu pee ta la carete,
l’è bon ancje di fâ l’estraneôs;
co l’è pe strade, se il paron ai pete,
al ferme la cariere, e, dut rabiôs,
par mostrâ che, se i pâr, fâs ce che l’ûl,
al paron che lu bat ai alze il cûl.
Se par câs, co ‘l viaze pa la strade,
s’incuintre cuntun altri so compagn,
lu salude fasint une cuarnade
e al cîr di dislassâsi da l’argagn;
e se ‘l cjate sporcjât di ca o di là
si ferme seneôs a tabacâ.

Co ‘l cjante, l’à ‘ne vôs plui tost potent
e, se co ‘l cjante, si è masse vizin,
lis sôs notis a dan tal sintiment.
Cuant che lis tire su a son di prin,
cuant che lis mole son di cuintribas,
cjantant al smene il cjâf e al scurte il pas.
Il mus al à scjaldât nestri Signôr
e dopo lu à puartât fin in Egjit.
La siore di Neron, imperatôr,
cussì, po, almancul, a si cjate scrit,
par vê la borie di una frescje scusse
si bagnave ogni dì tal lat di musse.
‘Ne volte al leve a tor simpri discolz,
ma vuê ancje lui al à i siei cuatri fiers.
L’è dificil che i mus diventin sbolz;
se son plaiâts, si scugn’ lassâju fers;
vivin a grame, cjanussis e stran;
no màngjin blave par che no ur dan.

di Pieri Masut

San Lurinç di Sedean, 23 di Avrîl dal 1944.